بيتر بان 

انا نمت و صحيت و لسه عايزة مفاجأة 

و ده دليل قاطع ان اللى ادركته امبارح مكنش مجرد ادراكات ليلية !

“لما طارق اتريق عليا لما  قلت “كانت ايام” و احنا معديين فى الميدان .. قال  ”انتى كنتى بتيجى تتفسحى اصلا 

ادايقت جدا ساعتها 

مع انى عارفة انه بيهزر 

بس عشان انا من يوم 25 يناير 2011 لحد اللحظة دى ويمكن لحد ما اموت 

هفضل عايشة باحساس بالذنب فى خلفية حياتى .. عايش معايا و عايشة معاه و مش بيروح

انا صحيح مشمتش الغاز غير ايام محمد محمود و ساعتها كنت هموت 

و عيطت وانا جوا من انى خايفة

عيطت انى خايفة .. امال اللى جوا دول يعملوا ايه 

عيطت انى جبانة 

و رجعت و مرحتش تانى 

لما رحت اتبرعت بالدم وهبطت وعشت كام يوم لما امشى خطوتين احس ان قلبى مش فى مكانه من كتر الدق وانى مش لاقية الهوا

بس مكنتش حاسة بالذنب .. كنت حاسة انى بدفع جزء من اللى عليا

انا عارفة ان التفكير كده مش صح

بس عارفين برضه كانت ايام

بجد و من غير كليشيهات كتيرة

بس شميناها فى ال18 يوم هناك

شمينا بجد

الحرية 

و الشمة دى يمكن اللى مخليانا مستحملين

طب هنعمل ايه لما تروح ! و لادى حاجة ابدية هتفضل معانا عطول زى احساسى بالذنب كده ؟!

لما بقول حاجة عنى اوى لحد بشكل شخصى

بحس انى ببعت حتة منى عنده

و ده احيانا بيحسسنى بفراغ صغير عندى 

فبكون محتاجة انى اسمع منه فى ساعتها يمكن يملى الفراغ “المؤقت” ده

هو ده معناه انى مش مليانة لدرجة انى لما احكى عنى حاجة ممكن احس بفراغ جوايا؟

بس مش فاكرة مين قالى او فاكرة

ان لما الواحد بيحكى حاجة .. بيبقى محتاج انه يسمع  من اللى حكاله عشان ميحسش انه هو بس اللى بيتكلم ويحكى عن نفسه

و فى اوقات بتبقى عايز تتكلم وتحكى كأنك بتكلم حيطة

ميتردش عليك .. ولما يترد عليك تدايق 

ممم

الحل الواحد يسكت يعنى؟

ما ده كمان بيحصل 

ساعات مريح و ساعات مؤلم لدرجة بتخليك برضه متتكلمش 

ممم

طيب بس مشكلة المفاجأت انك لازم تستناها 

و بعدين هى حاجة براك 

يعنى المفاجأة دى عامل خارجى .. انت مش هتعمل مفاجأة لنفسك

(مع ان ممكن يعنى .. بس ساعتها ممكن نفسى تصعب عليا)

المهم انا مش قادرة استنى 

مش بحب استنى .. بزهق 

انا عايزة اتفاجأ .. دى مش حاجة صعبة 

عايزة اندهش

عايزة قلبى يدق جامد من الفرحة من المفاجأة

انا عايزة قلبى يدق 

انا بقالى كتير قلبى مدقش 

ايوة بجد .. انا فعلا قلبى بقاله حبة مدقش 

!!!!

طيب يعنى دلوقتى المفاجأة محتاجة استنى عشان دى مش حاجة انا بعملها 

ممم

انا فعلا بجد وحقيقى نفسى فى مفاجأة 

غريبة اوى لما تعرف فجأة كده انت عايز ايه

انا عايزة حاجة تثبتنى و تخلينى افتح عينيا على الأخر وارفع حواجبى فوق اوى

و احشد كل طاقتى و نشاطى ليها 

ممكن فى الأخر احبط و ممكن اتبسط

مش مهم الأخر .. المهم الطريق لحد ما اوصل للأخر

الغريب انى بقول انى عايزة مفاجأة 

ايوة بجد انا نفسى فعلا فى مفاجأة 

محدش بيقول كده :)))

بس انا بقول و عايزاها حلوة و شخصية

و تثبتنى

البلد دى مفيهاش مفاجأت غير من نوع “شفيق و مرسى” .. و لا ايه

انا عايزة مفاجأة و عايزة افضل اقولها